ፓትረያርክ ኣቡነ እንጦንዮስ ብከቢድ ሓሚሞም

             ካብ ዕለት 13 ጥሪ 2006 ኣትሒዙ ብጹእ ወቅዱስ ኣቡነ እንጦንዮስ ፓትረያርክ ርእሰ ሊቃነ ጳጳሳት ኤርትራ ኣብ ትሕቲ ናይ ገዛ ማሕዩር ከምዝጸንሑ ዝፍለጥ እዩ። ብጹእ ወቅዱስ ኣቡነ እንጦንዮስ ኣብዚ እዋን’ዚ ኣብ ከቢድ ናይ ጥዕና ጸገም ወዲቖም ከምዘለዉ ምንጭታት ኤሪትረያ ዎች ሓቢሮም።                           

    ብጹእ ወቅዱስ ኣቡነ እንጦንዮስ ንዝለዓለ ሕክምና ንወጻኢ ክኸዱ እኳ እንተሓተቱ፣ እቲ ሃይማኖት ኮነ ብዓቢኡ ድማ መሰረታዊ ሰብኣዊ መሰል ቅጭጭ ዘይብሎ ስርዓት ህግደፍ ከምዝኣበዮም ተሓቢሩ።
ብጹእ ወቅዱስ ኣቡነ እንጦንዮስ ካብ ኣቦኦም ገብረመድህን ደብረጽዮን፣ ካብ ኣዴኦም ወ/ሮ ኢለን ቀለታ፣ ኣብ ዞባ ማእከል ሕምብርቲ ብ1927 ተወሊዶም። ኣብ 5 ዓመት ዕድሜኦም ድማ ንገዳም ደብረ ጽጌ ኣቡነ እንድርያስ ተወፍዮም።  
    ጉባኤ ቅዱስ ሲኖዶስ ኤርትራ ድሕሪ ዕረፍቲ ብጹእ ወቅዱስ ኣቡነ ያዕቆብ፣ ብዓቃቤ መንበርነት ክሰርሑ መዲብዎም ድሕሪ ምጽናሕ። የካቲት 2004 ኣብ ምኔታት ገዳማተ ኤርትራ ሓለፍቲ ቤት ጽሕፈት ቤተ ክህነት፣ ምእመናንን ተኣኪቦም ንምርጫ ካብ ዝቐረቡ ጳጳሳት ብዝለዓለ ድምጺ ንብጹእ ወቅዱስ ኣቡነ ኣንጦንዮስ ፓትረያርክ ክኾኑ መሪጾሞም።   

Posted: 29/01/2009