ብምኽንያት ጾም ኣርብዓ ኣብ ገዳማት ብጾምን ጸሎትን ተጸሚዶም ዝጸንሑ ጳጳሳት ሱባኤ ኣቋሪጾም ክሳብ ጊዜ ሕማማት ኣብ ኣስመራ ክእከቡ ዮፍታሄ ድመጥሮስ ትእዛዝ ኣመሓላሊፉ። በዚ መሰረት ኩሎም ጳጳሳት ሱባኤን ጸሎትን ኣቋሪጾም ጽዑቕ ኣኼባ ኣብ ምክያድ ይርከቡ ኣለዉ። እዚ ድማ ንኹሉ ኣብቲ ከባቢ ቤት ጽሕፈት ዝርከብ ሰራሕተኛ ኣገሪሙን ኣሕዚኑን ዘሎ ጉዳይ፡ ኮይኑ ኣሎ።


ዮፍታሄ ዲመጥሮስ ሕማም ሽኮርያ ኣሎኒ ብዝብል ምኽንያት ኣይጸውም ኣይቆርብ ኣረሜን ሰብ እዩ።
ቤተክርስትያናት ኤረትራ ብዝበኽዩን ዝጉህዩን ህዝቢ ካብ ጻት ናብ ጻት መሊኡ፣ ቀጽሪ ቤተክርስትያናት ብንብዓት ዘጠልቅየሉ ዘሎ መሪር እዋን ጾም ኣርብዓ ኢዩ።
ምሉእ ህዝቢ ኤረትራ ብሰንኪ እቲ ብስርዓት ህግደፍ ወሪድዎ ዘሎ ንምጽዋሩ ዘይከኣል ከቢድ መከራ ብሓደ ወገን፣ ወለዲ ምእንቲ መእሰያት ውሉዶም፡ መርዓት ምእንቲ ሰብኣያ፡ ቆለውዕ ምእንቲ እቶም ዘይሓቖፍዎምን ዘየሕንቀቕዎምን ኣቦታቶም ድማ ብኻልእ ወገን።

ብኣንጻሩ እቶም ዓለም መኒኖም ሱባኤ ቆጺሮም ቆጽሊ ሸምጢጦም፡ ዕስራን ኣርባዕተን ሰዓት ጸልዮም ናብ ኣምላኽ ከተዓርቑ ዝጽበይዎም ጳጳሳት ግና ምእንቲ ሓላፊ ስልጣን፡ ብሓደ ኣርሜን ፈሪሖምን ተሰናቢዶምን ነቲ ነብስን ስጋን ክፈርድ ዝኽእል ኣምላኽ ኣብ ክንዲ ምፍራህ፡ ንህግደፍን ተለኣኽቶምን ፈሪሆም ኣብዚ እዋን እዚ ከምዚ ዓይነት ገበን ክፍጽሙ ምርኣይ ብኣምላኽን ህዝቢ ኤረትራን ይቕረ ዝበሃለሉ ኣይኮነን።

"ዘይስንኻ ሕጻ ቆርጥመሉ" ከምዝበሃል ዮፍታሄ ድመጥሮስ ዝተዋግአ፡ ዝተሰዋአ፡ ወይውን ሕጂውን ኣብ ወፍሪ ባርነት ዝተዋፈረ ውላድ ይኹን ዘመድ የብሉን። እኳ ድኣ ብኣንጻሩ ደቁ ኣብ ኣመሪካ ተዓቒቦም ይርከቡ ኣለዉ። ንሱ ግና ሳላ ኣቡኡ ቀሺ ድመጥሮስ ደም ኤረትራውያን ሰትዩ ዝዓበየን ሕጅውን ብደም እቶም ዘህለቖም ኣብ መንበር ስልጣን ተቐሚጡ ኣሎ። ነገሩ "ወዲ ዓሻ ክልተ ሳዕ ይውቃዕ" ከምዝበሃል ዳግማይ ይቕጥቅጠና ኣሎ። እቶም ጳጳሳትውን ወሊዶም ኣይሓወሱን እዮም።

ዛዕባ እቲ ኣኼባ ናይ ዓለም ቤተክርስትያናት ብሰንኪ እቶም ኣብ ኣመሪካን ኣውሮጳን ዝርከቡ ግጉያት ጸረ ሃገርን ጸረ ቤተክርስትያንን ዝኾኑ፣ ኣብ ጎኒ ኣቡን ኣንጦንዮስ ደው ብምባሎም ንዕቀት ሲኖዶስን መንግስቲ ኤረትራን እዩ" ክብል ዮፍታሀ ገሊጽዎ። ደጊሙ ድማ ዝእግደና ሓይሊ ስለ ዘየለ ፓትርያርክና ክንመርጽ ኢና።

ኣብ ኣመሪካ ዝርከብ ኤምባሲ ኤረትራ እቲ ዝግብኦ ስለ ዘይፈጸመ፡ እቲ ብጳጳስና ኣባ ሲኖዳ ዝሕበሮ ከተግብር ስለ ዘይከኣለ ቤተክርስትያናት ይዓኑ ኣሎ። ሰብ ኣንጻርና ይለዓል ኣሎ። እታ መንበር ጵጵስና ኣብ ዋሽንግቶን ዲሲ ትርከብ ቤተ ክርስትያን እንዳ ስላሴ ኣብ ክልተ ተመቒላ ኣላ ነቲ ኣብኡ ኾይኑ ሽግር ዝፈጥር ዘሎ ቀሺ ኣፈወርቂ ጠሪዝኩም ለኣኹልና ተባሂሎምውን ከተግብሩ ኣይከኣሉን" ወዘተ ዝብል ሃጠውቀጠው ኢዩ ነይሩ።
ብተወሳኺ ድማ፣ ኣብ ኤውሮጳ ዝርከቡ ካህናትውን ብኣፎም ደኣ ምሳኹም ኢና ይበሉ እምበር ብግብሪ ምሳና ከም ዘየለዉ ኣረጋጊጸ እየ፡ እዚ ድማ ውጽኢቶም ኣብ ተቓውሞ እቲ ህዝቢ ምኽንያቱ ነቶም ዝመደብናዮም ጳጳስ ኣይንቕበሎምን ኢሎም ኩሎም ነጺገሞም እዮም። ዝብል ሪፖርት ዮፍታሄ ንሲኖዶስ ኣቕሪቡ።

ዛዕባ እቲ ኣኼባ እዝን ካልእን ኮይኑ፡ እቲ ኣብ ይሁዳ ሓዲሩ ኣብ እዋን ጾም ኣርብዓ ንኢየሱስ ክርስቶስ ኣብ ስቕለት ዘብጽሐ ልብሲ (ክዳን) ኢየሱስ ዝተማቐልዎ ጊዘን ሰይጣን ልክዕ ኣብ ጊዝኡን እዋኑን ኣብ ዮፍታሄ ሓዲሩ፡ ኣቐዲምና ከም ዝሓበርና ቅዱስ ኣቡነ ኣንጦንዮስ ክዳኖም ተቐንጢጡ፡ መስቀሎም ተመንጢሎም፡ ኣብ ጸልማት ገዛ ተዓጽዮም ነዛ ፈተና እዚኣ ክሓልፍዋ ይምህለሉ ኣለዉ። ኣባ ደስቁሮስን ኣባ ጴጥሮስን ድማ ክዳን ኣቦኦም ቀንጢጦም ንምኽዳን፡ ኣብ እግሪ ዲያብሎስ ዮፍታሄ ወዲቖም ይልምኑ ኣለዉ።

ውጽኢት ናይዚ ዮፍታሄ ዝገብሮ ዘሎ ዘርጊ ኣኼባ ኣብ ቀጻሊ ክንጽሕፍ ኢና። ሓደራ ነዚ ተጻጊምና ንጽሕፎ ዘሎና ኣብ ህዝቢ ተቃልሑልና ዘለኹም፡ ሃገራውያን ደምበ ኣዝማሪኖን ካልኦትን ነመስግነኩም ጥራይ ዘይኮነ ናብ ኣምላኽና ንጽልየልኩም ኣለና።

ደቂ ቅድስት ኦርቶዶክሳዊት ተዋህዶ ቤተ ክርስትያን
መነኮሳት፡ ካህናት፡ ዲያቆናት
ካብ ኣስመራ።