ኣብ ዝሓለፈ ቕንያት ኣስማትን ድሕረ ባይታን ናይ ሰለስተ ብስስዐ ገንዘብ ዓዊሮም፡ ንኤርትራውያን ኣሕዋቶም ብምትላልን ብምጭዋይን ንራሻይዳን በደዊንን ኣሕሊፎም ብምሃብ ግዳይ ስቅያት ናይ ዝገበሩዎም ሰለስተ ሸፋቱ ኣስማት ኣቃሊዕና ኔርና።
ሕጂ ‘ውን ነቲ ዝጀመርናዮ ናይ ምቅላዕ ዘመተ ብምቕጻል ናይ ካልኦት 9 ጨወይትን ዘሕጋውያን መሰገጋገርትን ኣስማት ነስዕበልኩም።
ንግዲ ሰብን ኣሕዋትካ ምእንቲ ገንዘብ ንስቓይ ኣሕሊፍካ ምሃብን፡ ነውሪ ወይ ጽዩፍ ተግባር ጥራይ ዘይኮነ፡ ኣዝዩ ዝኸበደ ገበን እዩ። ብፍላይ ኣብ ሱዳን መዓስከር ስደተኛታት ሸገራብን ካልእ ቦታታትን እትርከቡ፡ ከምኡ ‘ውን ካብ ኤርትራ ናብ ሱዳን እትሰግሩ ኤርትራውያን፡ ካብዞም ስሱዓት ነጋዶ ሰብ ክትጥንቀቑ ይግባእ። ነዚኣቶምን ካልኦት ኣብ ተመሳሳሊ ገበን ተዋፊሮም ዘለዉ ገበነኛታት ሰባት ምቅላዕ ናይ ኩሉ ዜጋ ሓላፍነት ምዃኑ ‘ውን ኣይትረስዑ።